صبر سے ٹوٹا ہوا ضبط سے ہارا ہوا میں

صبر سے ٹوٹا ہوا ضبط سے ہارا ہوا میں

جتنا باقی بچا ہوں اتنا تمہارا ہوا میں

پھول کھلتے گئے بنتا گیا تن گلدستہ

دیکھتے دیکھتے زخموں سے نظارہ ہوا میں

عمر بھر دنیا کے ایندھن میں پکایا گیا ہوں

آپ کے چاک سے ناپختہ اتارا ہوا میں

اب زمیں زاد مجھے دیکھ کے رہ دیکھتے ہیں

اونچا اڑتا گیا اتنا کہ ستارا ہوا میں

چننے والوں کا بھلا ہو جو مجھے ڈھونڈ کے لائے

ٹکڑے ٹکڑے کو ملا کر ہی تو سارا ہوا میں

زندگی ایک جواری کا گزارا ہوا پل

اور اس پل کے شبستان میں ہارا ہوا میں

جب مرے دل کا مچلتا ہوا ارماں ہوئے آپ

آپ کی جنبش ابرو کا اشارہ ہوا میں

آپ کو دیکھ کے کافر ہوا تھا شومئی بخت

آپ سے مل کے مسلمان دوبارہ ہوا میں

اب کسی لوح لحد کی طرح مٹتا ہوا نقش

اور پھر حشر میں اک نام پکارا ہوا میں

اپنی دیرینہ روایات کا سودا کر کے

اپنے اجداد کی دولت کا خسارہ ہوا میں

سالہا سال نگاہوں کے چلن سیکھے ہیں

اب کہیں جا کے زمانے کو گوارا ہوا میں

sabr se tuta hua zabt se hara hawa mein

jitna baqi bacha hun itna tumhara hawa mein

phul khulte gae banta gaya tan guldasta

dekhte dekhte zakhmon se nazara hawa mein

umr bhar duniya ke indhan mein pakaya gaya hun

ap ke chak se napukhta utara hawa mein

ab zamin zad mujhe dekh ke rah dekhte hain

uncha urta gaya itna ke sitara hawa mein

chunne walon ka bhala ho jo mujhe dhund ke lae

tukre tukre ko mila kar hi to sara hawa mein

zindagi ek jawari ka guzara hua pal

aur is pal ke shabistan mein hara hawa mein

jab mire dil ka machalta hua arman hue ap

ap ki jumbish-e-abru ka ishara hawa mein

ap ko dekh ke kafir hua tha shomai bakht

ap se mil ke musalman dobara hawa mein

ab kisi lauh-e-lahad ki tarah mitta hua naqsh

aur phir hashr mein ik nam pukara hawa mein

apni derina riwayat ka sauda kar ke

apne ajdad ki daulat ka khasara hawa mein

salha sal nigahon ke chalan sikhe hain

ab kahin ja ke zamane ko gawara hawa mein