عجلت کو اختیار نہ کر انتظار کر

عجلت کو اختیار نہ کر انتظار کر

خود پر جنوں سوار نہ کر انتظار کر

یہ اضطرار ضعف جنوں کی دلیل ہے

یوں خود کو بے قرار نہ کر انتظار کر

مانا کہ شہر دل کی فصیلوں میں چھید ہیں

قائم ابھی حصار نہ کر انتظار کر

بیٹا یہ عمر تاب طلب کاٹنے کی ہے

اس کمسنی میں پیار نہ کر انتظار کر

ممکن ہے شیخ جاں کی تجلی فریب ہو

دنیا و دیں نثار نہ کر انتظار کر

ہوں گے ضرور ختم یہ دردوں کے سلسلے

دریائے صبر پار نہ کر انتظار کر

رزم وفا میں سہہ کے دکھا تیر طنز کو

تیغ زباں سے وار نہ کر انتظار کر

کہہ کہہ کے بار بار جدائی کی بات کو

تو اور پائیدار نہ کر انتظار کر

دشت جنوں ابھی ہے غبار حواس میں

یوں شتر بے مہار نہ کر انتظار کر

آزادؔ ہو گئے ہیں اسیران راستی

اب دل کا اعتبار نہ کر انتظار کر

ujlat ko ikhtiyar na kar intizar kar

khud par junun sawar na kar intizar kar

ye iztirar zof-e-junun ki dalil hai

yun khud ko be qarar na kar intizar kar

mana ke shahr-e-dil ki fasilon mein chhed hain

qaim abhi hisar na kar intizar kar

beta ye umr tab talab katne ki hai

is kamsini mein pyar na kar intizar kar

mumkin hai shaikh jan ki tajalli fareb ho

duniya-o-din nisar na kar intizar kar

honge zarur khatm ye dardon ke silsile

dariya-e-sabr par na kar intizar kar

razm-e-wafa mein sah ke dikha tir tanz ko

tegh-e-zaban se war na kar intizar kar

kah kah ke bar bar judai ki bat ko

tu aur paidar na kar intizar kar

dasht-e-junun abhi hai ghubar-e-hawas mein

yun shutar be mahar na kar intizar kar

azad ho gae hain asiran-e-rasti

ab dil ka etibar na kar intizar kar