یوں بظاہر تو پس پشت نہ ڈالو گے ہمیں

یوں بظاہر تو پس پشت نہ ڈالو گے ہمیں

جانتے ہیں بڑی عزت سے نکالو گے ہمیں

اپنا گھر بار ہے ابعاد مکانی سے بلند

وقت کو ڈھونڈنے نکلو گے تو پا لو گے ہمیں

اتنے ظالم نہ بنو کچھ تو مروت سیکھو

تم پہ مرتے ہیں تو کیا مار ہی ڈالو گے ہمیں

تم نہیں آئے نہیں آئے مگر سوچا تھا

ہم اگر روٹھ بھی جائیں تو منا لو گے ہمیں

ہم ترے سامنے آئیں گے نگینہ بن کر

پہلے یہ وعدہ کرو پھر سے چرا لو گے ہمیں

تم بھی تھے بزم میں یہ سوچ کے ہم نے پی لی

ہم اگر مست ہوئے بھی تو سنبھالو گے ہمیں

قابل رحم بنے پھرتے ہیں اس آس پہ ہم

اپنے سینے سے کسی روز لگا لو گے ہمیں

ہم بڑی قیمتی مٹی سے بنائے گئے ہیں

خود کو ہم بیچنا چاہیں گے تو کیا لو گے ہمیں

ہم بھی کچھ اپنی تمنائیں سنائیں گے تمہیں

جب تم اپنی یہ تمنائیں سنا لو گے ہمیں

تم سے ہم دور چلے آئے ہیں صدیوں کے قریب

روشنی بن کے اگر آؤ تو آ لو گے ہمیں

ہم نہ بھولیں گے تمہیں جتنی بھی کوشش کر لو

بھولنے کے لیے ہر بار خیالو گے ہمیں

yun bazahir to pas-e-pusht na daloge hamen

jante hain bari izzat se nikaloge hamen

apna ghar bar hai abad makani se buland

waqt ko dhundne nikloge to pa loge hamen

itne zalim na bano kuchh to murawwat sikho

tum pe marte hain to kya mar hi daloge hamen

tum nahin ae nahin ae magar socha tha

ham agar ruth bhi jaen to mana loge hamen

ham tire samne aenge nagina ban kar

pahle ye waada karo phir se chura loge hamen

tum bhi the bazm mein ye soch ke ham ne pi li

ham agar mast hue bhi to sambhaloge hamen

qabil-e-rahm bane phirte hain is as pe ham

apne sine se kisi roz laga loge hamen

ham bari qimti mitti se banae gae hain

khud ko ham bechna chahenge to kya loge hamen

ham bhi kuchh apni tamannaen sunaenge tumhen

jab tum apni ye tamannaen suna loge hamen

tum se ham dur chale ae hain sadiyon ke qarib

raushni ban ke agar ao to a loge hamen

ham na bhulenge tumhen jitni bhi koshish kar lo

bhulne ke liye har bar khayalo ge hamen