دل کو صبر و قرار تم سے ہے

دل کو صبر و قرار تم سے ہے

زندگی خوش گوار تم سے ہے

دل کشی تم سے ہے ستاروں میں

گلستاں میں بہار تم سے ہے

اللہ اللہ رے یہ حسن و جمال

ماہ بھی شرمسار تم سے ہے

مجھ کو اس دور‌ زندگانی میں

ہر خوشی سازگار تم سے ہے

مست نظریں تمہاری کیا کہنا

اک جہاں بادہ خوار تم سے ہے

نگہتیں گل نثار کرتے ہیں

یہ فضا مشک بار تم سے ہے

گرچہ لاکھوں ستم سہے دل پر

پھر بھی پیکاںؔ کو پیار تم سے ہے

dil ko sabr-o-qarar tum se hai

zindagi khush gawar tum se hai

dil kashi tum se hai sitaron mein

gulsitan mein bahar tum se hai

allah allah re ye husn-o-jamal

mah bhi sharmsar tum se hai

mujh ko is daur-e-zindagani mein

har khushi sazgar tum se hai

mast nazren tumhari kya kahna

ik jahan bada khwar tum se hai

nighaten gul nisar karte hain

ye faza mushk bar tum se hai

garche lakhon sitam sahe dil par

phir bhi paikan ko pyar tum se hai