جبر حالات کا تو نام لیا ہے تم نے

جبر حالات کا تو نام لیا ہے تم نے

اپنے سر بھی کبھی الزام لیا ہے تم نے

مے کشی کے بھی کچھ آداب برتنا سیکھو

ہاتھ میں اپنے اگر جام لیا ہے تم نے

عمر گزری ہے اندھیرے کا ہی ماتم کرتے

اپنے شعلے سے بھی کچھ کام لیا ہے تم نے

ہم فقیروں سے ستائش کی تمنا کیسی

شہریاروں سے جو انعام لیا ہے تم نے

قرض بھی ان کے معانی کا ادا کرنا ہے

گرچہ لفظوں سے بڑا کام لیا ہے تم نے

ان اصولوں کے کبھی زخم بھی کھائے ہوتے

جن اصولوں کا بہت نام لیا ہے تم نے

لب پہ آتے ہیں بہت ذوق سفر کے نغمے

اور ہر گام پہ آرام لیا ہے تم نے

jabr halat ka to nam liya hai tum ne

apne sar bhi kabhi ilzam liya hai tum ne

mai kashi ke bhi kuchh adab baratna sikho

hath main apne agar jam liya hai tum ne

umr guzri hai andhere ka hi matam karte

apne shole se bhi kuchh kam liya hai tum ne

ham faqiron se sataish ki tamanna kaisi

shahryaron se jo inam liya hai tum ne

qarz bhi un ke maani ka ada karna hai

garche lafzon se bara kam liya hai tum ne

in usulon ke kabhi zakhm bhi khae hote

jin usulon ka bahut nam liya hai tum ne

lab pe ate hain bahut zauq-e-safar ke naghme

aur har gam pe aram liya hai tum ne