وہ احتیاط کے موسم بدل گئے کیسے

وہ احتیاط کے موسم بدل گئے کیسے

چراغ دل کے اندھیرے میں جل گئے کیسے

بنا دیا تھا زمانے نے برف کے مانند

ہم ایک شوخ کرن سے پگھل گئے کیسے

امید جن سے تھی وضع جنوں نبھانے کی

وہ لوگ وقت کے سانچے میں ڈھل گئے کیسے

ستارے جذب ہوئے گرد راہ میں کیا کیا

خیال و خواب کے آئیں بدل گئے کیسے

خزاں سے جن کو بچا لائے تھے جتن کر کے

وہ نخل اب کے بہاروں میں جل گئے کیسے

نہ جانے کیوں جنہیں سمجھے تھے ہم فرشتے ہیں

قریب آئے تو چہرے بدل گئے کیسے

ہر ایک سایۂ دیوار کی لپیٹ میں ہے

سرورؔ آپ ہی بچ کر نکل گئے کیسے

wo ehtiyat ke mausam badal gae kaise

charagh-e-dil ke andhere mein jal gae kaise

bana diya tha zamane ne barf ke manind

ham ek shokh kiran se pighal gae kaise

umid jin se thi waz-e-junun nibhane ki

wo log waqt ke sanche mein dhal gae kaise

sitare jazb hue gard-e-rah mein kya kiya

khayal-o-khwab ke aen badal gae kaise

khizan se jin ko bacha lae the jatan kar ke

wo nakhl ab ke baharon mein jal gae kaise

na jane kyun jinhen samjhe the ham farishte hain

qarib ae to chehre badal gae kaise

har ek saya-e-diwar ki lapet mein hai

surur ap hi bach kar nikal gae kaise