داستان شوق کتنی بار دہرائی گئی

داستان شوق کتنی بار دہرائی گئی

سننے والوں میں توجہ کی کمی پائی گئی

فکر ہے سہمی ہوئی جذبہ ہے مرجھایا ہوا

موج کی شورش گئی دریا کی گہرائی گئی

حسن بھی ہے مصلحت بیں عشق بھی دنیا شناس

آپ کی شہرت گئی یاروں کی رسوائی گئی

ہم تو کہتے تھے زمانہ ہی نہیں جوہر شناس

غور سے دیکھا تو اپنے میں کمی پائی گئی

زخم ملتے ہیں علاج زخم دل ملتا نہیں

وضع قاتل رہ گئی رسم مسیحائی گئی

گرد اڑائی جو سیاست نے وہ آخر دھل گئی

اہل دل کی خاک میں بھی زندگی پائی گئی

میری مدھم لے کا جادو اب بھی باقی ہے سرورؔ

فصل کے نغمے گئے موسم کی شہنائی گئی

dastan-e-shauq kitni bar dohrai gai

sunne walon mein tawajjoh ki kami pai gai

fikr hai sahmi hui jazba hai murjhaya hua

mauj ki shorish gai dariya ki gahrai gai

husn bhi hai maslahat bin ishq bhi duniya shanas

ap ki shohrat gai yaron ki ruswai gai

ham to kahte the zamana hi nahin jauhar shanas

ghaur se dekha to apne mein kami pai gai

zakhm milte hain ilaj-e-zakhm-e-dil milta nahin

waz-e-qatil rah gai rasm-e-masihai gai

gard urai jo siyasat ne wo akhir dhul gai

ahl-e-dil ki khak mein bhi zindagi pai gai

meri maddham le ka jadu ab bhi baqi hai surur

fasl ke naghme gae mausam ki shahnai gai