ہم برق و شرر کو کبھی خاطر میں نہ لائے

ہم برق و شرر کو کبھی خاطر میں نہ لائے

اس فتنۂ دوراں کو مگر دیکھ نہ پائے

گو قطرے میں دریاؤں کا طوفان سمائے

پر شوق کی روداد کب الفاظ میں آئے

زلفوں کو دیا ہے رخ زیبا نے عجب رنگ

جلووں سے ترے اور بھی روشن ہوئے سائے

یہ عشق کے شعلے بھی عجب چیزیں ہیں یعنی

جو آگ لگائے وہی خود آگ بجھائے

ڈھلتی ہے وہ مے اک ترے پیمانے میں ساقی

مستی کو بھی جو ہوش کے آداب سکھائے

تیری ہی نگاہوں کا تصرف تھا کہ ہم نے

رعنائی افکار کے اعجاز دکھائے

جس دل پہ کسی کی نگہ لطف پڑی تھی

بیٹھے ہیں سرورؔ اس کو کلیجے سے لگائے

ham barq-o-sharar ko kabhi khatir mein na lae

is fitna-e-dauran ko magar dekh na pae

go qatre mein dariyaon ka tufan samae

par shauq ki rudad kab alfaz mein ae

zulfon ko diya hai rukh-e-zeba ne ajab rang

jalwon se tire aur bhi raushan hue sae

ye ishq ke shole bhi ajab chizen hain yaani

jo ag lagae wahi khud ag bujhae

dhalti hai wo mai ik tire paimane mein saqi

masti ko bhi jo hosh ke adab sikhae

teri hi nigahon ka tasarruf tha ke ham ne

raanai-e-afkar ke ejaz dikhae

jis dil pe kisi ki nigah-e-lutf pari thi

baithe hain surur us ko kaleje se lagae