شگفتگیٔ دل ویراں میں آج آ ہی گئی

شگفتگیٔ دل ویراں میں آج آ ہی گئی

گھٹا چمن پہ بہاروں کو لے کے چھا ہی گئی

حیات تازہ کے خطروں سے دل دھڑکتا تھا

ہوا چلی تو کلی پھر بھی مسکرا ہی گئی

نقاب میں بھی وہ جلوے نہ قید ہو پائے

کرن دلوں کے اندھیرے کو جگمگا ہی گئی

تغافل ایک بھرم تھا غرور جاناں کا

مری نگاہ محبت کا رمز پا ہی گئی

مطالبے تو بہت سخت تھے زمانے کے

مگر حقوق محبت کی یاد آ ہی گئی

مرے جنوں کی خلش سے اب اور کیا ہوتا

سکوت اہل خرد کو تو آزما ہی گئی

متاع قلب و نظر خاک ہوتے ہوتے بھی

جہان حسن کی کچھ آبرو بڑھا ہی گئی

تھپک تھپک کے سلایا جو تم نے ذوق سخن

سرورؔ اس کو کسی کی نظر جگا ہی گئی

shaguftagi-e-dil-e-wiran mein aj a hi gai

ghata chaman pe baharon ko le ke chha hi gai

hayat-e-taza ke khatron se dil dharakta tha

hawa chali to kali phir bhi muskura hi gai

naqab mein bhi wo jalwe na qaid ho pae

kiran dilon ke andhere ko jagmaga hi gai

taghaful ek bharam tha ghurur janan ka

miri nigah-e-mohabbat ka ramz pa hi gai

mutalibe to bahut sakht the zamane ke

magar huquq mohabbat ki yad a hi gai

mire junun ki khalish se ab aur kiya hota

sukut-e-ahl-e-khirad ko to azma hi gai

mata-e-qalb-o-nazar khak hote hote bhi

jahan-e-husn ki kuchh abru barha hi gai

thapak thapak ke sulaya jo tum ne zauq-e-sukhan

surur us ko kisi ki nazar jaga hi gai