فغان درد میں بھی درد کی خلش ہی نہیں

فغان درد میں بھی درد کی خلش ہی نہیں

دلوں میں آگ لگی ہے مگر تپش ہی نہیں

کہاں سے لائیں وہ سوز و گداز دل والے

کہ دلبری کا وہ آہنگ وہ روش ہی نہیں

حقیقتوں کے بھی تیور بدل تو سکتے ہیں

ہماری بزم میں خوابوں کی وہ خلش ہی نہیں

دماغ کیوں نہ ہو ساحل پہ سونے والوں کا

کبھی کبھار جو طوفاں کی سرزنش ہی نہیں

لبھائے گا اسے کیا چاند کا خنک جادو

جسے نصیب کڑی دھوپ کی تپش ہی نہیں

زمانہ قصۂ دار و رسن کو بھول نہ جائے

کسی کے حلقۂ گیسو میں وہ کشش ہی نہیں

یہ رنگ و بو کے طلسمات کس لیے ہیں سرورؔ

بہار کیا ہے جنوں کی جو پرورش ہی نہیں

fughan-e-dard mein bhi dard ki khalish hi nahin

dilon mein ag lagi hai magar tapish hi nahin

kahan se laen wo soz-o-gudaz-e-dil wale

ke dilbari ka wo ahang wo rawish hi nahin

haqiqaton ke bhi tewar badal to sakte hain

hamari bazm mein khwabon ki wo khalish hi nahin

dimagh kyun na ho sahil pe sone walon ka

kabhi kabhar jo tufan ki sarzanish hi nahin

lubhaega use kya chand ka khunuk jadu

jise nasib kari dhup ki tapish hi nahin

zamana qissa-e-dar-o-rasan ko bhul na jae

kisi ke halqa-e-gesu mein wo kashish hi nahin

ye rang-o-bu ke tilismat kis liye hain surur

bahar kya hai junun ki jo parwarish hi nahin