ہر ایک گام پہ اک بت بنانا چاہا ہے

ہر ایک گام پہ اک بت بنانا چاہا ہے

جسے بھی چاہا بہت کافرانہ چاہا ہے

ہزار قسم کے الزام اور خاموشی

تعلقات کو یوں بھی نبھانا چاہا ہے

گرائے جانے لگے ہیں درخت ہر جانب

کہ میں نے شاخ پہ اک آشیانہ چاہا ہے

ہے کیوں عداوت اغیار ہی کا ذکر یہاں

چمن تو اہل چمن نے جلانا چاہا ہے

حصار نفرت دور جدید میں دل نے

محبتوں کا پرانا زمانہ چاہا ہے

خدایا دشت نوردی کا شوق ہے کس کو

مسافروں نے فقط آب و دانہ چاہا ہے

چمن میں پھول تصورؔ کھلیں ہر اک جانب

اسی سبب سے تو صحرا بسانا چاہا ہے

har ek gam pe ik but banana chaha hai

jise bhi chaha bahut kafirana chaha hai

hazar qism ke ilzam aur khamoshi

taalluqat ko yun bhi nibhana chaha hai

girae jane lage hain darakht har janib

ke main ne shakh pe ik ashiyana chaha hai

hai kyun adawat-e-aghyar hi ka zikr yahan

chaman to ahl-e-chaman ne jalana chaha hai

hisar-e-nafrat daur-e-jadid mein dil ne

mohabbaton ka purana zamana chaha hai

khudaya dasht nawardi ka shauq hai kis ko

musafiron ne faqat ab-o-dana chaha hai

chaman mein phul tasawwur khulen har ik janib

isi sabab se to sahra basana chaha hai