حصول رزق کے ارماں نکالتے گزری

حصول رزق کے ارماں نکالتے گزری

حیات ریت سے سکے ہی ڈھالتے گزری

مسافرت کی صعوبت میں عمر بیت گئی

بچی تو پاؤں سے کانٹے نکالتے گزری

ہوا نے جشن منائے وہ انتظار کی رات

چراغ حجرۂ فرقت سنبھالتے گزری

وہ تیز لہر تو ہاتھوں سے لے گئی کشتی

پھر اس کے بعد سمندر کھنگالتے گزری

رسائی جس کی نہ تھی بے کراں سمندر تک

وہ موج نہر بھی چھینٹے اچھالتے گزری

یہی نہیں کہ ستارے تھے دسترس سے بعید

ذرا ذرا سے تمنا بھی ٹالتے گزری

تمام عمر تصورؔ ردائے بخت سیاہ

مشقتوں کے لہو سے اجالتے گزری

husul-e-rizq ke arman nikalte guzri

hayat ret se sake hi dhalte guzri

masafrat ki suubat mein umr bit gai

bachi to paon se kante nikalte guzri

hawa ne jashn manae wo intizar ki rat

charagh-e-hujra-e-furqat sambhalte guzri

wo tez lahr to hathon se le gai kashti

phir is ke baad samundar khangalte guzri

rasai jis ki na thi be karan samundar tak

wo mauj nahr bhi chhinte uchhalte guzri

yahi nahin ke sitare the dastaras se baid

zara zara se tamanna bhi talte guzri

tamam umr tasawwur rida-e-bakht-e-siyah

mashaqqaton ke lahu se ujalte guzri