آہ و گریہ میں کہاں تاثیر ہے

آہ و گریہ میں کہاں تاثیر ہے

ضبط میں ہی اشکوں کی توقیر ہے

ہو گئے یکساں اداسی اور میں

ایک صورت ایک سی تصویر ہے

جو مری سانسوں کی سیلن سوکھ لے

کیا کوئی شے اتنی بھی نم گیر ہے

غم مری قسمت ہے میں غم کا نصیب

اپنی اپنی دونوں کی تقدیر ہے

ایک محور پر ازل سے محو رقص

یہ زمیں بھی کوئی صوفی پیر ہے

رات بھر آنکھوں نے لکھا ایک خواب

یہ غزل اس خواب کی تعبیر ہے

ah-o-girya mein kahan tasir hai

zabt mein hi ashkon ki tauqir hai

ho gae yaksan udasi aur main

ek surat ek si taswir hai

jo miri sanson ki silan sukh le

kya koi shai itni bhi nam gir hai

gham miri qismat hai main gham ka nasib

apni apni donon ki taqdir hai

ek mehwar par azal se mahw-e-raqs

ye zamin bhi koi sufi pir hai

rat bhar ankhon ne likha ek khwab

ye ghazal is khwab ki taabir hai