کہیں منزل کہیں رستہ پرانا چھوٹ جاتا ہے

کہیں منزل کہیں رستہ پرانا چھوٹ جاتا ہے

سفر میں زیست کے منظر سہانا چھوٹ جاتا ہے

رقابت کا سبب بنتا ہے اکثر روز کا ملنا

ذرا سی بات پہ ملنا ملانا چھوٹ جاتا ہے

بہت افسوس ہوتا ہے ضعیفی میں بزرگوں کو

جواں بیٹے کا جب مضبوط شانہ چھوٹ جاتا ہے

یہی دستور فطرت ہے خزاں کے دور میں اکثر

شجر کے ہاتھ سے پتا پرانا چھوٹ جاتا ہے

سمجھ لیجے اجل کا ہم سفر ہے وہ بشر اب تو

بہت پہلے سے جس کا آب و دانا چھوٹ جاتا ہے

سفر میں ہم سفر مل جائے جس کو چاند کا ٹکڑا

پھر اس سے دوست کیا سارا زمانہ چھوٹ جاتا ہے

متاع دہر پر اے نصرؔ اتنا ناز کیا کرنا

عدم کی راہ میں سارا خزانہ چھوٹ جاتا ہے

kahin manzil kahin rasta purana chhut jata hai

safar mein zist ke manzar suhana chhut jata hai

raqabat ka sabab banta hai aksar roz ka milna

zara si bat pe milna milana chhut jata hai

bahut afsos hota hai zaifi mein buzurgon ko

jawan bete ka jab mazbut shana chhut jata hai

yahi dastur fitrat hai khizan ke daur mein aksar

shajar ke hath se patta purana chhut jata hai

samajh lije ajal ka ham safar hai wo bashar ab to

bahut pahle se jis ka ab-o-dana chhut jata hai

safar mein ham safar mil jae jis ko chand ka tukra

phir us se dost kya sara zamana chhut jata hai

mata-e-dahr par ai nasr itna naz kya karna

adam ki rah mein sara khazana chhut jata hai