کہیں گلاب کہیں سبز گھاس رہنے دو

کہیں گلاب کہیں سبز گھاس رہنے دو

چمن کو میرے ذرا خوش لباس رہنے دو

میں خار و خس ہی سہی کچھ تو کام آؤں گا

مجھے جلاؤ نہیں گھر کے پاس رہنے دو

خوشی ملی ہے تمہاری یہ خوش نصیبی ہے

اداس رہنا ہے مجھ کو اداس رہنے دو

کبھی تمہاری نظر مجھ پہ کیوں نہیں پڑتی

سنا ہے تم ہو ستارہ شناس رہنے دو

فقیر رکھتے نہیں زرق برق پوشاکیں

مرے بدن پہ یہ سادہ لباس رہنے دو

زبان کھولو گے جب بھی انا بھی جائے گی

کرو نہ اس سے کوئی التماس رہنے دو

ہزار تلخ ہے لہجہ کسی کا نصرؔ تو کیا

زباں میں اپنی مگر تم مٹھاس رہنے دو

kahin gulab kahin sabz ghas rahne do

chaman ko mere zara khush libas rahne do

main khar-o-khas hi sahi kuchh to kam aunga

mujhe jalao nahin ghar ke pas rahne do

khushi mili hai tumhari ye khush nasibi hai

udas rahna hai mujh ko udas rahne do

kabhi tumhari nazar mujh pe kyun nahin parti

suna hai tum ho sitara shanas rahne do

faqir rakhte nahin zarq barq poshaken

mire badan pe ye sada libas rahne do

zaban khologe jab bhi ana bhi jaegi

karo na us se koi iltimas rahne do

hazar talkh hai lahja kisi ka nasr to kya

zaban main apni magar tum mithas rahne do