وفا کا عہد تھا دل کو سنبھالنے کے لئے

وفا کا عہد تھا دل کو سنبھالنے کے لئے

وہ ہنس پڑے مجھے مشکل میں ڈالنے کے لئے

بندھا ہوا ہے بہاروں کا اب وہیں تانتا

جہاں رکا تھا میں کانٹے نکالنے کے لئے

کوئی نسیم کا نغمہ کوئی شمیم کا راگ

فضا کو امن کے قالب میں ڈھالنے کے لئے

خدا نہ کردہ زمیں پاؤں سے اگر کھسکی

بڑھیں گے تند بگولے سنبھالنے کے لئے

اتر پڑے ہیں کدھر سے یہ آندھیوں کے جلوس

سمندروں سے جزیرے نکالنے کے لئے

ترے سلیقۂ ترتیب نو کا کیا کہنا

ہمیں تھے قریۂ دل سے نکالنے کے لئے

کبھی ہماری ضرورت پڑے گی دنیا کو

دلوں کی برف کو شعلوں میں ڈھالنے کے لئے

یہ شعبدے ہی سہی کچھ فسوں گردوں کو بلاؤ

نئی فضا میں ستارے اچھالنے کے لئے

ہے صرف ہم کو ترے خال و خد کا اندازہ

یہ آئنہ تو ہیں حیرت میں ڈالنے کے لئے

نہ جانے کتنی مسافت سے آئے گا سورج

نگار شب کا جنازہ نکالنے کے لئے

میں پیش رو ہوں اسی خاک سے اگیں گے چراغ

نگاہ و دل کے افق کو اجالنے کے لئے

فصیل شب سے کوئی ہاتھ بڑھنے والا ہے

فضا کی جیب سے سورج نکالنے کے لئے

کنویں میں پھینک کے پچھتا رہا ہوں اے دانشؔ

کمند تھی جو مناروں پہ ڈالنے کے لئے

wafa ka ahd tha dil ko sambhalne ke liye

wo hans pare mujhe mushkil mein dalne ke liye

bandha hua hai baharon ka ab wahin tanta

jahan ruka tha main kante nikalne ke liye

koi nasim ka naghma koi shamim ka rag

faza ko amn ke qalib mein dhalne ke liye

khuda na karda zamin paon se agar khiski

barhenge tund bagule sambhalne ke liye

utar pare hain kidhar se ye andhiyon ke julus

samundaron se jazire nikalne ke liye

tire saliqa-e-tartib-e-nau ka kya kahna

hamen the qarya-e-dil se nikalne ke liye

kabhi hamari zarurat paregi duniya ko

dilon ki barf ko sholon mein dhalne ke liye

ye shobade hi sahi kuchh fusun gardun ko bulao

nai faza mein sitare uchhalne ke liye

hai sirf ham ko tire khal-o-khad ka andaza

ye aina to hain hairat mein dalne ke liye

na jane kitni masafat se aega suraj

nigar-e-shab ka janaza nikalne ke liye

main pesh ro hun isi khak se ugenge charagh

nigah-o-dil ke ufuq ko ujalne ke liye

fasil-e-shab se koi hath barhne wala hai

faza ki jeb se suraj nikalne ke liye

kuen mein phenk ke puchhta raha hun ai danish

kamand thi jo manaron pe dalne ke liye