رعنائی کونین سے بے زار ہمیں تھے

رعنائی کونین سے بے زار ہمیں تھے

ہم تھے ترے جلووں کے طلب گار ہمیں تھے

ہے فرق طلب گار و پرستار میں اے دوست

دنیا تھی طلب گار پرستار ہمیں تھے

اس بندہ نوازی کے تصدق سر محشر

گویا تری رحمت کے سزاوار ہمیں تھے

دے دے کے نگاہوں کو تصور کا سہارا

راتوں کو ترے واسطے بیدار ہمیں تھے

بازار ازل یوں تو بہت گرم تھا لیکن

لے دے کے محبت کے خریدار ہمیں تھے

کھٹکے ہیں ترے سارے گلستاں کی نظر میں

سب اپنی جگہ پھول تھے اک خار ہمیں تھے

ہاں آپ کو دیکھا تھا محبت سے ہمیں نے

جی سارے زمانے کے گنہ گار ہمیں تھے

ہے آج وہ صورت کہ بنائے نہیں بنتی

کل نقش دو عالم کے قلم کار ہمیں تھے

پچھتاؤگے دیکھو ہمیں بیگانہ سمجھ کر

مانوگے کسی وقت کہ غم خوار ہمیں تھے

ارباب وطن خوش ہیں ہمیں دل سے بھلا کر

جیسے نگہ و دل پہ بس اک بار ہمیں تھے

احسانؔ ہے بے سود گلہ ان کی جفا کا

چاہا تھا انہیں ہم نے خطاوار ہمیں تھے

raanai-e-kaunain se be zar hamen the

ham the tire jalwon ke talab gar hamen the

hai farq talab gar-o-parastar mein ai dost

duniya thi talab gar parastar hamen the

is banda nawazi ke tasadduq sar-e-mahshar

goya tiri rahmat ke sazawar hamen the

de de ke nigahon ko tasawwur ka sahara

raton ko tire waste bedar hamen the

bazar-e-azal yun to bahut garm tha lekin

le de ke mohabbat ke kharidar hamen the

khatke hain tire sare gulistan ki nazar mein

sab apni jagah phul the ik khar hamen the

han ap ko dekha tha mohabbat se hamen ne

ji sare zamane ke gunah gar hamen the

hai aj wo surat ke banae nahin banti

kal naqsh do alam ke qalam kar hamen the

pachhtaoge dekho hamen begana samajh kar

manoge kisi waqt ke gham khwar hamen the

arbab-e-watan khush hain hamen dil se bhula kar

jaise nigah-o-dil pe bas ik bar hamen the

ehsan hai be sud gila un ki jafa ka

chaha tha unhen ham ne khatawar hamen the