حوصلے مایوس ذوق جستجو ناکام ہے

حوصلے مایوس ذوق جستجو ناکام ہے

یہ دل‌ نا محرم انجام کا انجام ہے

آنکھ کیا ہے حسن کی رنگینیوں کا آئنہ

دل ہے کیا خون تمنا کا چھلکتا جام ہے

دیجیے بیمار‌ الفت کی جگر داری کی داد

نزع کا عالم ہے ہونٹوں پر تمہارا نام ہے

پھر وہ یاد آئے ہوئی مدہوش دل کی کائنات

پھر اٹھا درد جگر پھر کچھ مجھے آرام ہے

خاکدان دہر میں تسکین کا جویا نہ ہو

آہ جب تک دل دھڑکتا ہے کہاں آرام ہے

وہ تو دل میں درد کی دنیا بسا کر چل دئے

مجھ کو ہر تار نفس اک موت کا پیغام ہے

واصل مضراب خاموشی ہے ہر تار نفس

اس سے کہہ دو اب ترے بیمار کو آرام ہے

کر رہا ہوں دوستوں کے زعم پر ترک وطن

شاید اب آغاز دور گردش ایام ہے

hausle mayus zauq-e-justuju nakam hai

ye dil-e-na mahram anjam ka anjam hai

ankh kya hai husn ki ranginiyon ka aina

dil hai kya khun-e-tamanna ka chhalakta jam hai

dijiye bimar ulfat ki jigar dari ki dad

nazaa ka alam hai honton par tumhara nam hai

phir wo yad ae hui madhosh dil ki kainat

phir utha dard-e-jigar phir kuchh mujhe aram hai

khakdan dahr mein taskin ka joya na ho

ah jab tak dil dharakta hai kahan aram hai

wo to dil mein dard ki duniya basa kar chal diye

mujh ko har tar-e-nafas ik maut ka paigham hai

wasil-e-mizrab-e-khamoshi hai har tar-e-nafas

us se kah do ab tire bimar ko aram hai

kar raha hun doston ke zaam par tark-e-watan

shayad ab aghaz-e-daur-e-gardish-e-ayyam hai