بنا دیں گی دنیا کو اک دن شرابی

بنا دیں گی دنیا کو اک دن شرابی

یہ بد مست آنکھیں یہ ڈورے گلابی

ہیں قصر محبت کے معمار دونوں

نگاہوں کا دھوکا دلوں کی خرابی

یہ کفر مجسم یہ زہد سراپا

یہ گنجان گیسو یہ روئے کتابی

ہر اک شے میں تم مسکراتے ہو گویا

ہزاروں حجابوں میں یہ بے حجابی

ابھی تک نگاہوں پہ چھائی ہوئی ہے

وہ مستی میں ڈوبی ہوئی نیم خوابی

عبث عشق کو انتظار اثر ہے

اثر تک کہاں آہ کی باریابی

بجز اس کے احسانؔ کو کیا سمجھئے

بہاروں میں کھویا ہوا اک شرابی

bana dengi duniya ko ik din sharabi

ye bad mast ankhen ye dore gulabi

hain qasr-e-mohabbat ke memar donon

nigahon ka dhoka dilon ki kharabi

ye kufr-e-mujassam ye zohd-e-sarapa

ye gunjan gesu ye ru-e-kitabi

har ik shai mein tum muskurate ho goya

hazaron hijabon mein ye be hijabi

abhi tak nigahon pe chhai hui hai

wo masti mein dubi hui nim khwabi

abas ishq ko intizar-e-asar hai

asar tak kahan ah ki baryabi

bajuz us ke ehsan ko kya samajhiye

baharon mein khoya hua ik sharabi