Arooz is now on the App Store, for iPhone and iPad. Download →

All poetry

یوں نہ مل مجھ سے خفا ہو جیسے

Ehsan Danish (1914–1982)

یوں نہ مل مجھ سے خفا ہو جیسے

ساتھ چل موج صبا ہو جیسے

لوگ یوں دیکھ کے ہنس دیتے ہیں

تو مجھے بھول گیا ہو جیسے

عشق کو شرک کی حد تک نہ بڑھا

یوں نہ مل ہم سے خدا ہو جیسے

موت بھی آئی تو اس ناز کے ساتھ

مجھ پہ احسان کیا ہو جیسے

ایسے انجان بنے بیٹھے ہو

تم کو کچھ بھی نہ پتہ ہو جیسے

ہچکیاں رات کو آتی ہی رہیں

تو نے پھر یاد کیا ہو جیسے

زندگی بیت رہی ہے دانشؔ

ایک بے جرم سزا ہو جیسے