موسم سے رنگ و بو ہیں خفا دیکھتے چلو

موسم سے رنگ و بو ہیں خفا دیکھتے چلو

یہ کیا چلی چمن میں ہوا دیکھتے چلو

انبار ہر طرف ہیں اندھیروں کے یہ درست

شاید نہیں ہو آب بقا دیکھتے چلو

تسکین سنبل و گل و لالہ کے واسطے

کیا دے رہی ہے باد صبا دیکھتے چلو

جتنے تھے جاں نثار چمن بعد صبح نو

کچھ اجر بھی کسی کو ملا دیکھتے چلو

اصنام زر کے پاؤں میں ڈالے ہوئے جبیں

کتنے ہیں بندگان خدا دیکھتے چلو

کس کس کا اعتماد وفا ہو گیا شکست

کس کس کو حسن سے ہے گلا دیکھتے چلو

دانشؔ کو ضد ہے دیر و حرم بھی سہی مگر

کس کو ملا ہے ان کا پتا دیکھتے چلو

mausam se rang-o-bu hain khafa dekhte chalo

ye kya chali chaman mein hua dekhte chalo

ambar har taraf hain andheron ke ye durust

shayad nahin ho ab-e-baqa dekhte chalo

taskin-e-sumbul-o-gul-o-lala ke waste

kya de rahi hai bad-e-saba dekhte chalo

jitne the jan nisar chaman baad subh-e-nau

kuchh ajr bhi kisi ko mila dekhte chalo

asnam zar ke paon mein dale hue jabin

kitne hain bandgan-e-khuda dekhte chalo

kis kis ka etimad-e-wafa ho gaya shikast

kis kis ko husn se hai gila dekhte chalo

danish ko zid hai dair-o-haram bhi sahi magar

kis ko mila hai un ka pata dekhte chalo