رندان‌ تشنہ کام کو جا کر خبر کریں

رندان‌ تشنہ کام کو جا کر خبر کریں

آئی بہار ابر کرم پر نظر کریں

ہوں منفعل ضرور مگر اے گناہ عشق

اب اشک بھی نہیں ہیں جو دامن کو تر کریں

بے وجہ کب ہے پرسش حال شب فراق

مقصد یہ ہے اضافۂ درد جگر کریں

فرصت کے دن ہیں ساقئ میکش نواز اٹھ

کیوں انتظار موسم دیوانہ گر کریں

مجھ پر اٹھا رہے ہیں جو محفل میں انگلیاں

اپنی حقیقتوں پہ تو آخر نظر کریں

کعبہ میں خاموشی ہے صنم خانے میں سکوت

صورت پرست اب ترے سجدہ کدھر کریں

اف رے جمال جلوۂ جاناں کی تابشیں

دیکھیں انہیں کہ ماتم تاب نظر کریں

اوراق دو جہاں پہ بھی ہوگا نہ اختتام

احسانؔ سرگذشت الم مختصر کریں

rindan-e-tishna kam ko ja kar khabar karen

ai bahar abr-e-karam par nazar karen

hun munfail zarur magar ai gunah-e-ishq

ab ashk bhi nahin hain jo daman ko tar karen

be wajh kab hai pursish-e-hal-e-shab-e-firaq

maqsad ye hai izafa-e-dard-e-jigar karen

fursat ke din hain saqi-e-maikash nawaz uth

kyun intizar mausam-e-diwana gar karen

mujh par utha rahe hain jo mahfil mein ungliyan

apni haqiqaton pe to akhir nazar karen

kaaba mein khamoshi hai sanam khane mein sukut

surat parast ab tire sajda kidhar karen

uf re jamal-e-jalwa-e-janan ki tabishen

dekhen unhen ke matam-e-tab-e-nazar karen

auraq-e-do jahan pe bhi hoga na ikhtitam

ehsan sargazshat-e-alam mukhtasar karen