جبیں کی دھول جگر کی جلن چھپائے گا

جبیں کی دھول جگر کی جلن چھپائے گا

شروع عشق ہے وہ فطرتاً چھپائے گا

دمک رہا ہے جو نس نس کی تشنگی سے بدن

اس آگ کو نہ ترا پیرہن چھپائے گا

ترا علاج شفا گاہ عصر نو میں نہیں

خرد کے گھاؤ تو دیوانہ پن چھپائے گا

حصار ضبط ہے ابر رواں کی پرچھائیں

ملال روح کو کب تک بدن چھپائے گا

نظر کا فرد عمل سے ہے سلسلہ درکار

یقیں نہ کر یہ سیاہی کفن چھپائے گا

کسے خبر تھی کہ یہ دور خود غرض اک دن

جنوں سے قیمت دار و رسن چھپائے گا

ترا غبار زمیں پر اترنے والا ہے

کہاں تک اب یہ بگولہ تھکن چھپائے گا

کھلے گا باد نفس سے جو رخ پہ نیل کنول

اسے کہاں ترا اجلا بدن چھپائے گا

ترے کمال کے دھبے ترے عروج کے داغ

چھپائے گا تو کوئی اہل فن چھپائے گا

جسے ہے فیض مری خانقاہ سے دانشؔ

وہ کس طرح مرا رنگ سخن چھپائے گا

jabin ki dhul jigar ki jalan chhupaega

shuru-e-ishq hai wo fitratan chhupaega

damak raha hai jo nas nas ki tishnagi se badan

is ag ko na tira pairahan chhupaega

tira ilaj-e-shifa gah asr-e-nau mein nahin

khirad ke ghao to diwana pan chhupaega

hisar-e-zabt hai abr-e-rawan ki parchhain

malal ruh ko kab tak badan chhupaega

nazar ka fard-e-amal se hai silsila darkar

yaqin na kar ye siyahi kafan chhupaega

kise khabar thi ke ye daur-e-khud gharaz ik din

junun se qimat dar-o-rasan chhupaega

tira ghubar-e-zamin par utarne wala hai

kahan tak ab ye bagula thakan chhupaega

khulega bad-e-nafas se jo rukh pe nil kanwal

use kahan tira ujla badan chhupaega

tire kamal ke dhabbe tire uruj ke dagh

chhupaega to koi ahl-e-fan chhupaega

jise hai faiz miri khanqah se danish

wo kis tarah mira rang-e-sukhan chhupaega