آیا نہیں ہے راہ پہ چرخ کہن ابھی

آیا نہیں ہے راہ پہ چرخ کہن ابھی

خطرے میں دیکھتا ہوں چمن کا چمن ابھی

اٹھیں گے اپنی بزم سے منصور سیکڑوں

کام اہل حق کے آئیں گے دار و رسن ابھی

رنج و محن نگاہ جو پھیریں تو پھیر لیں

لیکن مجھے عزیز ہیں رنج و محن ابھی

بڑھنے دو اور شوق شہادت عوام میں

کچھ بانجھ تو نہیں ہے یہ خاک وطن ابھی

آنکھوں کی سرخیاں ہیں عزائم کا اشتہار

سینے سلگ رہے ہیں لگی ہے لگن ابھی

یہ کارواں شناور طوفاں تو ہے مگر

چہروں پہ بولتی ہے سفر کی تھکن ابھی

ہیں سامنے ہمارے روایات‌ کارزار

باندھے ہوئے ہیں سر سے مجاہد کفن ابھی

بن بن کے جانے کتنے فنا ہوں گے سومنات

بستے ہیں ہر گلی میں یہاں بت شکن ابھی

اے شہریار ہم سے شکستہ دلوں میں آ

تیری طرف سے خلق کو ہے حسن ظن ابھی

رقصاں ابھی ہیں شام غریباں کی جھلکیاں

روشن نہیں ہے خندۂ‌ صبح‌ وطن ابھی

جیتے رہیں امید پہ رندان‌ تشنہ کام

چلتا نہیں ہے دور شراب کہن ابھی

جن کے لہو سے قصر وفا میں جلے چراغ

ان غم زدوں میں عام ہیں رنج و محن ابھی

گلشن سے پھول چل کے مزاروں تک آ گئے

لیکن ہے باغباں کی جبیں پر شکن ابھی

ہے علم کی نگاہ سے پنہاں رہ‌ عمل

کہتے نہیں کفن کو یہاں پیرہن ابھی

نبض بہار پر ہیں بگولوں کی انگلیاں

چلنے کو چل رہی ہے نسیم چمن ابھی

شبنم کے اشک سوکھنے دیتی نہیں فضا

ہنستا ہے خود بہار چمن پر چمن ابھی

ہر گام ہر مقام پہ کوشش کے باوجود

دانشؔ نہ آ سکا مجھے جینے کا فن ابھی

aya nahin hai rah pe charkh-e-kuhan abhi

khatre mein dekhta hun chaman ka chaman abhi

uthenge apni bazm se mansur saikron

kam ahl-e-haq ke aenge dar-o-rasan abhi

ranj-o-mehan nigah jo pheren to pher len

lekin mujhe aziz hain ranj-o-mehan abhi

barhne do aur shauq-e-shahadat awam mein

kuchh banjh to nahin hai ye khak-e-watan abhi

ankhon ki surkhiyan hain azaim ka ishtihar

sine sulag rahe hain lagi hai lagan abhi

ye karwan shanaor-e-tufan to hai magar

chehron pe bolti hai safar ki thakan abhi

hain samne hamare riwayat-e-karzar

bandhe hue hain sar se mujahid kafan abhi

ban ban ke jane kitne fana honge somnat

baste hain har gali mein yahan but shikan abhi

ai shahryar ham se shikasta dilon mein a

teri taraf se khalq ko hai husn-e-zan abhi

raqsan abhi hain sham-e-ghariban ki jhalkiyan

raushan nahin hai khanda-e-subh-e-watan abhi

jite rahen umid pe rindan-e-tishna kam

chalta nahin hai daur-e-sharab-e-kuhan abhi

jin ke lahu se qasr-e-wafa mein jale charagh

un gham zadon mein am hain ranj-o-mehan abhi

gulshan se phul chal ke mazaron tak a gae

lekin hai baghban ki jabin par shikan abhi

hai ilm ki nigah se pinhan rah-e-amal

kahte nahin kafan ko yahan pairahan abhi

nabz-e-bahar par hain bagulon ki ungliyan

chalne ko chal rahi hai nasim-e-chaman abhi

shabnam ke ashk sukhne deti nahin faza

hansta hai khud bahar-e-chaman par chaman abhi

har gam har maqam pe koshish ke bawajud

danish na a saka mujhe jine ka fan abhi