ہزاروں غم ہیں اس منزل میں منزل دیکھنے والے

ہزاروں غم ہیں اس منزل میں منزل دیکھنے والے

کلیجہ تھام لے اپنا مرا دل دیکھنے والے

یہ دل والوں کو تعلیم سجود پائے جاناں ہے

سر ہر موج کو برپائے ساحل دیکھنے والے

ہر اک ذرے میں پوشیدہ ہے اک طغیان مدہوشی

سنبھل کر دیکھنا پیمانۂ دل دیکھنے والے

مٹاتا جا رہا ہوں نقش پا صحرا نوردی میں

کہاں ڈھونڈیں گے مجھ کو میری منزل دیکھنے والے

تیرے دل میں ہزاروں محفلیں جلووں کی پنہاں ہیں

فلک پر انجم تاباں کی محفل دیکھنے والے

فشار ضبط سے لیلیٰ کہیں مجنوں نہ ہو جائے

نہ دیکھ اب سوئے محمل سوئے محمل دیکھنے والے

کسی کا عکس ہوں احسانؔ مراعات حقیقت میں

مجھے سمجھیں گے کیا تصویر باطل دیکھنے والے

hazaron gham hain is manzil mein manzil dekhne wale

kaleja tham le apna mira dil dekhne wale

ye dil walon ko taalim-e-sujud pae janan hai

sar har mauj ko barpa-e-sahil dekhne wale

har ik zarre mein poshida hai ik tughyan-e-madhoshi

sambhal kar dekhna paimana-e-dil dekhne wale

mitata ja raha hun naqsh-e-pa sahra nawardi mein

kahan dhundenge mujh ko meri manzil dekhne wale

tere dil mein hazaron mahfilen jalwon ki pinhan hain

falak par anjum-e-taban ki mahfil dekhne wale

fishar-e-zabt se laila kahin majnun na ho jae

na dekh ab su-e-mahmil su-e-mahmil dekhne wale

kisi ka aks hun ehsan muraat-e-haqiqat mein

mujhe samjhenge kya taswir batil dekhne wale