جو لے کے ان کی تمنا کے خواب نکلے گا

جو لے کے ان کی تمنا کے خواب نکلے گا

بہ عجز شوق بہ حال خراب نکلے گا

جو رنگ بانٹ کے جاتا ہے تنکے تنکے کو

عدو زمیں کا یہی آفتاب نکلے گا

بھری ہوئی ہے کئی دن سے دھند گلیوں میں

نہ جانے شہر سے کب یہ عذاب نکلے گا

جو دے رہے ہو زمیں کو وہی زمیں دے گی

ببول بوئے تو کیسے گلاب نکلے گا

ابھی تو صبح ہوئی ہے شب تمنا کی

بہیں گے اشک تو آنکھوں سے خواب نکلے گا

مرے گناہ بہت ہیں مگر تقابل میں

اسی کا لطف و کرم بے حساب نکلے گا

ملا کسی کو نہ دانشؔ کچھ آرزو کے خلاف

پس فنا بھی یہی انتخاب نکلے گا

jo le ke un ki tamanna ke khwab niklega

ba ijz shauq ba hal-e-kharab niklega

jo rang bant ke jata hai tinke tinke ko

adu zamin ka yahi aftab niklega

bhari hui hai kai din se dhund galiyon mein

na jane shahr se kab ye azab niklega

jo de rahe ho zamin ko wahi zamin degi

babul boe to kaise gulab niklega

abhi to subh hui hai shab-e-tamanna ki

bahenge ashk to ankhon se khwab niklega

mire gunah bahut hain magar taqabul mein

usi ka lutf-o-karam be hisab niklega

mila kisi ko na danish kuchh arzu ke khilaf

pas fana bhi yahi intikhab niklega