اب کہو کارواں کدھر کو چلے

اب کہو کارواں کدھر کو چلے

راستے کھو گئے چراغ جلے

آنسوؤں میں نہا گئیں خوشیاں

روٹھ کر جب وہ آ لگے ہیں گلے

عشق غم کو عبور کر نہ سکا

راستے کارواں کے ساتھ چلے

ہم پہ گزری ہیں ہجر کی راتیں

ہم جہنم میں تھے مگر نہ جلے

تھے محبت کی ابتدا کے قصور

وہ تبسم جو آنسوؤں میں ڈھلے

خاک سے سینکڑوں اگے خورشید

ہے اندھیرا مگر چراغ تلے

چاند ساکت ہے رک گئے تارے

اب وہ آئیں تو غم کی رات ڈھلے

مے کدے کا تو ذکر بھی ہے گناہ

اب حیات حرم پڑی ہے گلے

پرسش حال کا جواب تھا کیا

ہنس پڑے ہم کہ جلد بات ٹلے

ab kaho karwan kidhar ko chale

raste kho gae charagh jale

ansuon mein naha gain khushiyan

ruth kar jab wo a lage hain gale

ishq gham ko ubur kar na saka

raste karwan ke sath chale

ham pe guzri hain hijr ki raten

ham jahannam mein the magar na jale

the mohabbat ki ibtida ke qusur

wo tabassum jo ansuon mein dhale

khak se sainkron uge khurshid

hai andhera magar charagh tale

chand sakit hai ruk gae tare

ab wo aen to gham ki rat dhale

mai kade ka to zikr bhi hai gunah

ab hayat-e-haram pari hai gale

pursish-e-hal ka jawab tha kya

hans pare ham ke jald bat tale