سوز جنوں کو دل کی غذا کر دیا گیا

سوز جنوں کو دل کی غذا کر دیا گیا

اک زہر جاں طلب کو دوا کر دیا گیا

ناسور بھر سکے نہ فغاں ضبط ہو سکی

جب نے کو نیستاں سے جدا کر دیا گیا

اہل وفا میں موت کی تلخی کو سر بسر

قنداب زندگی سے سوا کر دیا گیا

ازبر کرا دیا ہے خزاں کو نصاب گل

صرصر کو درس دے کے صبا کر دیا گیا

سورج سے رنگ رنگ کی کرنیں بکھیر کر

مٹی کا زرد کھیت ہرا کر دیا گیا

لہکی اذان بجنے لگے راستوں کے فرش

کرنوں کو قید شب سے رہا کر دیا گیا

روح بہار خون شہیداں کا رنگ دیکھ

خاک چمن کو لالہ قبا کر دیا گیا

soz-e-junun ko dil ki ghiza kar diya gaya

ik zahr-e-jan talab ko dawa kar diya gaya

nasur bhar sake na fughan zabt ho saki

jab ne ko nayastan se juda kar diya gaya

ahl-e-wafa mein maut ki talkhi ko sar basar

qandab zindagi se siwa kar diya gaya

azbar kara diya hai khizan ko nisab-e-gul

sarsar ko dars de ke saba kar diya gaya

suraj se rang rang ki kirnen bikher kar

mitti ka zard khet hara kar diya gaya

lahki azan bajne lage raston ke farsh

kirnon ko qaid-e-shab se raha kar diya gaya

ruh-e-bahar khun-e-shahidan ka rang dekh

khak-e-chaman ko lala qaba kar diya gaya