جب رخ حسن سے نقاب اٹھا

جب رخ حسن سے نقاب اٹھا

بن کے ہر ذرہ آفتاب اٹھا

ڈوبی جاتی ہے ضبط کی کشتی

دل میں طوفان اضطراب اٹھا

مرنے والے فنا بھی پردہ ہے

اٹھ سکے گر تو یہ حجاب اٹھا

شاہد مئے کی خلوتوں میں پہنچ

پردۂ نشۂ شراب اٹھا

ہم تو آنکھوں کا نور کھو بیٹھے

ان کے چہرے سے کیا نقاب اٹھا

عالم حسن سادگی توبہ

عشق کھا کھا کے پیچ و تاب اٹھا

ہوش نقص خودی ہے اے احسانؔ

لا اٹھا شیشۂ شراب اٹھا

jab rukh-e-husn se naqab utha

ban ke har zarra aftab utha

dubi jati hai zabt ki kashti

dil mein tufan-e-iztirab utha

marne wale fana bhi parda hai

uth sake gar to ye hijab utha

shahid mai ki khalwaton mein pahunch

parda-e-nasha-e-sharab utha

ham to ankhon ka nur kho baithe

un ke chehre se kya naqab utha

alam-e-husn-e-sadgi tauba

ishq kha kha ke pech-o-tab utha

hosh naqs-e-khudi hai ai ehsan

la utha shisha-e-sharab utha