وفائیں کر کے جفاؤں کا غم اٹھائے جا

وفائیں کر کے جفاؤں کا غم اٹھائے جا

اسی طرح سے زمانے کو آزمائے جا

کسی میں اپنی صفت کے سوا کمال نہیں

جدھر اشارۂ فطرت ہو سر جھکائے جا

وہ لو رباب سے نکلی دھواں اٹھا دل سے

وفا کا راگ اسی دھن میں گنگنائے جا

نظر کے ساتھ محبت بدل نہیں سکتی

نظر بدل کے محبت کو آزمائے جا

خودی عشق نے جس دن سے کھول دیں آنکھیں

ہے آنسوؤں کا تقاضا کہ مسکرائے جا

نہیں ہے غم تو محبت کی تربیت ناقص

حوادث آئیں تو نرمی سے پیش آئے جا

تھی ابتدا میں یہ تادیب مفلسی مجھ کو

غلام رہ کے غلامی پہ مسکرائے جا

بدل نہ راہ خرد کے فریب میں آ کر

جنوں کے نقش قدم پر قدم بڑھائے جا

امید و یاس میں جینا ہے عشق کا مقصود

اسی مقام مقدس پہ تلملائے جا

چمن میں فرصت و تسکیں ہے موت کا پیغام

سکوں پسند نہ کر آشیاں بنائے جا

یہی ہے لطف محبت یہی ہے کیف حیات

حقیقتوں کی بنا پر فریب کھائے جا

وفا کا خواب ہے احسانؔ خواب بے تعبیر

وفائیں کر کے مقدر کو آزمائے جا

wafaen kar ke jafaon ka gham uthae ja

isi tarah se zamane ko azmae ja

kisi main apni sifat ke siwa kamal nahin

jidhar ishara-e-fitrat ho sar jhukae ja

wo lo rabab se nikli dhuan utha dil se

wafa ka rag isi dhun mein gungunae ja

nazar ke sath mohabbat badal nahin sakti

nazar badal ke mohabbat ko azmae ja

khudi ishq ne jis din se khol den ankhen

hai ansuon ka taqaza ke muskurae ja

nahin hai gham to mohabbat ki tarbiyat naqis

hawadis aen to narmi se pesh ae ja

thi ibtida mein ye tadib muflisi mujh ko

ghulam rah ke ghulami pe muskurae ja

badal na rah-e-khirad ke fareb mein a kar

junun ke naqsh-e-qadam par qadam barhae ja

ummid-o-yas mein jina hai ishq ka maqsud

usi maqam muqaddas pe tilmilae ja

chaman mein fursat-o-taskin hai maut ka paigham

sukun pasand na kar ashiyan banae ja

yahi hai lutf-e-mohabbat yahi hai kaif-e-hayat

haqiqaton ki bana pur fareb khae ja

wafa ka khwab hai ehsan khwab-e-be taabir

wafaen kar ke muqaddar ko azmae ja