سب ہیں محتاج فقط ایک خدا دیتا ہے

سب ہیں محتاج فقط ایک خدا دیتا ہے

مانگ کے دیکھ وہ دامن سے سوا دیتا ہے

دل تو پھر دل ہے وہ پتھر کو جلا دیتا ہے

جس کو چھو دیتا ہے آئینہ بنا دیتا ہے

میں کہ ویرانے میں اک پھول کھلانے سے رہا

وہ کہ صحرا کو بھی گلزار بنا دیتا ہے

دل وہ پاگل ہے کہ روتا ہے تو روتے روتے

قطرۂ اشک کا انبار لگا دیتا ہے

پھونس کا گھر ہے مرے گاؤں کے اندر سب کا

بجھتے شعلوں کو یہاں کون ہوا دیتا ہے

مجھ کو انگور کی بیٹی سے وہ حاصل نہ ہوا

تیری آنکھوں کا تصور جو نشہ دیتا ہے

سر ہتھیلی پہ لئے قصد سفر لازم ہے

حوصلہ سوئے یقیں بڑھ کے صدا دیتا ہے

تھم گئی نبض مری سانس کی لے لوٹ گئی

چارہ گر چھوڑ دے بے کار دوا دیتا ہے

راگ دیپک میں سناتا ہے غزل جب انجمؔ

اپنی آواز سے وہ آگ لگا دیتا ہے

sab hain mohtaj faqat ek khuda deta hai

mang ke dekh wo daman se siwa deta hai

dil to phir dil hai wo patthar ko jala deta hai

jis ko chhu deta hai aina bana deta hai

main ke wirane mein ik phul khilane se raha

wo ke sahra ko bhi gulzar bana deta hai

dil wo pagal hai ke rota hai to rote rote

qatra-e-ashk ka ambar laga deta hai

phuns ka ghar hai mire gaon ke andar sab ka

bujhte sholon ko yahan kaun hua deta hai

mujh ko angur ki beti se wo hasil na hua

teri ankhon ka tasawwur jo nasha deta hai

sar hatheli pe liye qasd-e-safar lazim hai

hausla su-e-yaqin barh ke sada deta hai

tham gai nabz miri sans ki le laut gai

chara gar chhor de be kar dawa deta hai

rag dipak mein sunata hai ghazal jab anjum

apni awaz se wo ag laga deta hai