کس چمن پہ گرنا ہے بجلیاں سمجھتی ہیں

کس چمن پہ گرنا ہے بجلیاں سمجھتی ہیں

شاخ گل کی طاقت کو آندھیاں سمجھتی ہیں

کون پھول کیسا ہے باغبان کیا جانے

پھول کی لطافت کو تتلیاں سمجھتی ہیں

صرف تازہ خبروں پر اعتماد مت کرنا

کس کا بھاؤ کتنا ہے منڈیاں سمجھتی ہیں

کون آنے والا ہے اس غریب خانے میں

میرے دل کی حالت کو سسکیاں سمجھتی ہیں

آج کل کے بیٹے تو کچھ سمجھ نہیں پاتے

باپ کی جفا کاری بیٹیاں سمجھتی ہیں

میرے دل کو نسبت ہے اب بھی ایسی پریوں سے

جو مری دعاؤں کو گالیاں سمجھتی ہیں

ہچکیوں سے ملتی ہے یاد کی جھلک انجمؔ

نبض کی حرارت کو انگلیاں سمجھتی ہیں

kis chaman pe girna hai bijliyan samajhti hain

shakh-e-gul ki taqat ko andhiyan samajhti hain

kaun phul kaisa hai baghban kya jane

phul ki latafat ko titliyan samajhti hain

sirf taza khabron par etimad mat karna

kis ka bhao kitna hai mandiyan samajhti hain

kaun ane wala hai is gharib khane mein

mere dil ki halat ko siskiyan samajhti hain

aj kal ke bete to kuchh samajh nahin pate

bap ki jafa kari betiyan samajhti hain

mere dil ko nisbat hai ab bhi aisi pariyon se

jo miri duaon ko galiyan samajhti hain

hichkiyon se milti hai yad ki jhalak anjum

nabz ki hararat ko ungliyan samajhti hain