پوجنے والے سبھی لوگ ہیں فرزانے کو

پوجنے والے سبھی لوگ ہیں فرزانے کو

پوچھتا کون ہے اس شہر میں دیوانے کو

گفتگو کوچہ و بازار کی لے آتے ہیں

جانے کیا لوگ سمجھتے ہیں خدا خانے کو

میں بنایا گیا ایثار و وفا کی خاطر

تیری تخلیق ہوئی ظلم و ستم ڈھانے کو

ہم سے ذی فہم ان آنکھوں کی پیا کرتے ہیں

نا سمجھ لوگ چلے جاتے ہیں میخانے کو

تم سے بگڑی ہوئی تقدیر ہماری نہ بنی

ہم تو گلزار بنا دیتے ہیں ویرانے کو

اپنی خاطر کوئی سوغات نہ مانگی اس نے

خط میں لکھا ہے مجھے لوٹ کے آ جانے کو

اس نے انجمؔ لب و رخسار کی رعنائی سے

دے دیا رنگ حقیقت مرے افسانے کو

pujne wale sabhi log hain farzane ko

puchhta kaun hai is shahr mein diwane ko

guftugu kucha-o-bazar ki le ate hain

jane kya log samajhte hain khuda khane ko

main banaya gaya isar-o-wafa ki khatir

teri takhliq hui zulm-o-sitam dhane ko

ham se zi fahm in ankhon ki piya karte hain

na samajh log chale jate hain maikhane ko

tum se bigri hui taqdir hamari na bani

ham to gulzar bana dete hain wirane ko

apni khatir koi saughat na mangi us ne

khat mein likha hai mujhe laut ke a jane ko

us ne anjum lab-o-rukhsar ki raanai se

de diya rang haqiqat mire afsane ko