ہنستا ہے بار بار مرا یار دیکھ کر

ہنستا ہے بار بار مرا یار دیکھ کر

مجھ کو مصیبتوں میں گرفتار دیکھ کر

یہ کاروبار شوق ہے وہ صاحب ہنر

سامان بیچتے ہیں خریدار دیکھ کر

وہ ہر قدم پہ ٹھوکریں کھاتے ہیں بارہا

چلتے نہیں جو وقت کی رفتار دیکھ کر

پژمردہ پھول ہے وہ اسی نو بہار کا

پتھر نہ پھینکو طنز کا بے کار دیکھ کر

وہ لوگ پاسبان حرم ہو نہ پائیں گے

جو بھاگتے ہیں لشکر کفار دیکھ کر

حیرت زدہ رہے گا وہ میدان حشر میں

جو مجھ کو ٹوکتا تھا گنہ گار دیکھ کر

پیارے نبی کے نطق کا اعجاز دیکھیے

کنکر بھی کلمہ پڑھتے ہیں گفتار دیکھ کر

انجمؔ وطن کی یاد بھی شدت سے آ گئی

اک مادر غریب کو بیمار دیکھ کر

hansta hai bar bar mira yar dekh kar

mujh ko musibaton mein giraftar dekh kar

ye karobar-e-shauq hai wo sahab-e-hunar

saman bechte hain kharidar dekh kar

wo har qadam pe thokaren khate hain barha

chalte nahin jo waqt ki raftar dekh kar

pazhmurda phul hai wo isi nau bahar ka

patthar na phenko tanz ka be kar dekh kar

wo log pasban-e-haram ho na paenge

jo bhagte hain lashkar-e-kuffar dekh kar

hairat zada rahega wo maidan-e-hashr mein

jo mujh ko tokta tha gunah gar dekh kar

pyare nabi ke nutq ka ejaz dekhiye

kankar bhi kalima parhte hain guftar dekh kar

anjum watan ki yad bhi shiddat se a gai

ik madar-e-gharib ko bimar dekh kar