بجھا بجھا سا گل تر دکھائی دیتا ہے

بجھا بجھا سا گل تر دکھائی دیتا ہے

عجیب شہر کا منظر دکھائی دیتا ہے

میں جس کے واسطے پھولوں کا ہار لایا ہوں

اسی کے ہاتھ میں خنجر دکھائی دیتا ہے

یہ شہر شیشہ گراں کو خبر نہیں شاید

ہر ایک ہاتھ میں پتھر دکھائی دیتا ہے

یقین کیسے کروں غیر کی محبت کا

کہ اپنا بھائی ستم گر دکھائی دیتا ہے

قلم اٹھانے کا جس کو ابھی شعور نہیں

وہ آدمی بھی سخنور دکھائی دیتا ہے

نگاہ ڈالی ہے جب سے مرے مسیحا نے

بلندیوں پہ مقدر دکھائی دیتا ہے

تمہاری بزم میں تاریکیاں ہیں کیوں انجمؔ

فلک پہ چاند سا دلبر دکھائی دیتا ہے

bujha bujha sa gul-e-tar dikhai deta hai

ajib shahr ka manzar dikhai deta hai

main jis ke waste phulon ka har laya hun

usi ke hath mein khanjar dikhai deta hai

ye shahr shisha giran ko khabar nahin shayad

har ek hath mein patthar dikhai deta hai

yaqin kaise karun ghair ki mohabbat ka

ke apna bhai sitam gar dikhai deta hai

qalam uthane ka jis ko abhi shuur nahin

wo admi bhi sukhanwar dikhai deta hai

nigah dali hai jab se mire masiha ne

bulandiyon pe muqaddar dikhai deta hai

tumhari bazm mein tarikiyan hain kyun anjum

falak pe chand sa dilbar dikhai deta hai