حال دل ہم نے سنایا تو برا مان گئے

حال دل ہم نے سنایا تو برا مان گئے

اشک آنکھوں میں جو آیا تو برا مان گئے

وعدہ کرکے جو نہ آئے تو کوئی بات نہیں

بے وفا کہہ کے بلایا تو برا مان گئے

جس کے ہر لفظ میں ہر بند میں نام ان کا تھا

ہم نے وہ گیت سنایا تو برا مان گئے

وہ جو غیروں سے ہم آغوش ہوا کرتے ہیں

ان کو پہلو میں بٹھایا تو برا مان گئے

آپ نے جشن چراغوں کا منایا لیکن

اک دیا ہم نے جلایا تو برا مان گئے

جام پہ جام اٹھاتے رہے پینے والے

ہم نے جو ہاتھ بڑھایا تو برا مان گئے

ناز پہ ناز اٹھایا تو بڑے اچھے تھے

نیند سے ان کو جگایا تو برا مان گئے

عیب ہر شخص میں جو ڈھونڈ رہے تھے انجمؔ

آئنہ ان کو دکھایا تو برا مان گئے

hal-e-dil ham ne sunaya to bura man gae

ashk ankhon mein jo aya to bura man gae

waada karke jo na ae to koi bat nahin

be wafa kah ke bulaya to bura man gae

jis ke har lafz mein har band mein nam un ka tha

ham ne wo git sunaya to bura man gae

wo jo ghairon se ham aghosh hua karte hain

un ko pahlu mein bithaya to bura man gae

ap ne jashn charaghon ka manaya lekin

ik diya ham ne jalaya to bura man gae

jam pe jam uthate rahe pine wale

ham ne jo hath barhaya to bura man gae

naz pe naz uthaya to bare achchhe the

nind se un ko jagaya to bura man gae

aib har shakhs mein jo dhund rahe the anjum

aina un ko dikhaya to bura man gae