انتظار دید میں یوں آنکھ پتھرائی کہ بس

انتظار دید میں یوں آنکھ پتھرائی کہ بس

مرتے مرتے وہ ہوئی عالم میں رسوائی کہ بس

دیکھ کر شبنم کی حالت ہنس پڑی نو رس‌‌ کلی

دو گھڑی پتوں پہ رہ کر اتنا اترائی کہ بس

دل کی دھڑکن بڑھ گئی آنکھوں میں آنسو آ گئے

اک ذرا سی بات پر اتنی ہنسی آئی کہ بس

موت کو بھی مرنے والے پر ترس آ ہی گیا

اس طرح چڑھتی جوانی میں قضا آئی کہ بس

بات کیسی اب تو ہونٹوں پر ہے آہوں کا ہجوم

چوٹ کھانے پر بھی ایسی چوٹ پر کھائی کہ بس

توبہ کرنے کو تو کر لی حضرت غواصؔ نے

یک بیک گردوں پہ وہ کالی گھٹا چھائی کہ بس

intizar-e-did mein yun ankh pathrai ke bas

marte marte wo hui alam mein ruswai ke bas

dekh kar shabnam ki halat hans pari nau ras kali

do ghari patton pe rah kar itna itrai ke bas

dil ki dharkan barh gai ankhon mein ansu a gae

ik zara si bat par itni hansi ai ke bas

maut ko bhi marne wale par taras a hi gaya

is tarah charhti jawani mein qaza ai ke bas

bat kaisi ab to honton par hai ahon ka hujum

chot khane par bhi aisi chot par khai ke bas

tauba karne ko to kar li hazrat-e-ghawwas ne

yak bayak gardun pe wo kali ghata chhai ke bas