بازار ترے شہر کے بدنام بہت ہیں

بازار ترے شہر کے بدنام بہت ہیں

چھوٹی سی خوشی کے بھی یہاں دام بہت ہیں

میں کیسے چلوں حوصلے کا ہاتھ پکڑ کر

اس زندگی میں گردش ایام بہت ہیں

ہونٹوں سے بغاوت کی سدا کیسے ہو جاری

واعظ کو حکومت سے ابھی کام بہت ہیں

اس دور میں امید کروں عدل کی کیسے

منصف پہ ہی جب قتل کے الزام بہت ہیں

آغوش میں اور وقت کے باقی ہیں سخنور

غالبؔ بھی کئی میرؔ بھی خیامؔ بہت ہیں

یہ شہر بھی محفوظ نہیں قہر خدا سے

ساقی بھی ہیں مے خانے بھی ہیں جام بہت ہیں

وہ ذات ہے واحد وہ ہی خالق وہ ہی رازق

مخلوق نے پر اس کو دئے نام بہت ہیں

امداد و عبادت میں ریا کاری نہ ہو چاندؔ

اخلاص عمل پر وہاں انعام بہت ہیں

bazar tire shahr ke badnam bahut hain

chhoti si khushi ke bhi yahan dam bahut hain

main kaise chalun hausle ka hath pakar kar

is zindagi mein gardish-e-ayyam bahut hain

honton se baghawat ki sada kaise ho jari

waiz ko hukumat se abhi kam bahut hain

is daur mein ummid karun adl ki kaise

munsif pe hi jab qatl ke ilzam bahut hain

aghosh mein aur waqt ke baqi hain sukhanwar

ghalib bhi kai mir bhi khayyam bahut hain

ye shahr bhi mahfuz nahin qahr-e-khuda se

saqi bhi hain mai khane bhi hain jam bahut hain

wo zat hai wahid wo hi khaliq wo hi raziq

makhluq ne par us ko diye nam bahut hain

imdad-o-ibadat mein riya kari na ho chand

ikhlas-e-amal par wahan inam bahut hain