یہ کمرہ اور یہ گرد و غبار اس کا ہے

یہ کمرہ اور یہ گرد و غبار اس کا ہے

وہ جس نے آنا نہیں انتظار اس کا ہے

رکی ہوں زخم کے رقبے میں اپنی مرضی سے

یہ جانتی ہوں کہ قرب و جوار اس کا ہے

کسی خسارے کے سودے میں ہاتھ آیا تھا

سو ایک قیمتی شے میں شمار اس کا ہے

فقط فراق تو اتنا نشہ نہیں رکھتا

میں لڑکھڑائی ہوں جس سے خمار اس کا ہے

خرید سکتی تھی سو میں خرید لائی ہوں

وہ میرے پاس ہے چاہے ہزار اس کا ہے

دریدہ جاں ہوں دریدہ لباسیاں بھی ہیں

مگر یہ کم تو نہیں تار تار اس کا ہے

میں سینت سینت کے کتنا سمیٹ کر رکھوں

کہ کائنات بھرا انتشار اس کا ہے

نہ جانے بولتی رہتی ہوں نیند میں کیا کیا

جو نام سنتی ہوں میں بار بار اس کا ہے

میں گھر سے جاؤں تو تالا لگا کے جاتی ہوں

کچھ اس کی شہرتیں کچھ اعتبار اس کا ہے

ye kamra aur ye gard-o-ghubar us ka hai

wo jis ne ana nahin intizar us ka hai

ruki hun zakhm ke raqbe main apni marzi se

ye janti hun ke qurb-o-jawar us ka hai

kisi khasare ke saude mein hath aya tha

so ek qimti shai mein shumar us ka hai

faqat firaq to itna nasha nahin rakhta

main larkharai hun jis se khumar us ka hai

kharid sakti thi so main kharid lai hun

wo mere pas hai chahe hazar us ka hai

darida jan hun darida libasiyan bhi hain

magar ye kam to nahin tar tar us ka hai

main sint sint ke kitna samet kar rakhun

ke kainat bhara intishar us ka hai

na jane bolti rahti hun nind mein kya kiya

jo nam sunti hun main bar bar us ka hai

main ghar se jaun to tala laga ke jati hun

kuchh us ki shohraten kuchh etibar us ka hai