کسی کے ساتھ کیا نسبت ہوئی تھی

کسی کے ساتھ کیا نسبت ہوئی تھی

میں اپنے آپ سے رخصت ہوئی تھی

پلٹ کر پیچھے دیکھا تھا ذرا سا

مجھے خود پر بڑی حیرت ہوئی تھی

اچانک آ گئی تھی اپنے آگے

اچانک بات کی جرأت ہوئی تھی

خود اپنا ساتھ بھی چبھنے لگا تھا

عجب تنہائی کی عادت ہوئی تھی

مرے اندر بھنور اٹھنے لگے تھے

سمندر سے بڑی وحشت ہوئی تھی

بہت سرگوشیاں شیشے سے کی تھیں

کسی کی مجھ سے بھی غیبت ہوئی تھی

kisi ke sath kya nisbat hui thi

main apne ap se rukhsat hui thi

palat kar pichhe dekha tha zara sa

mujhe khud par bari hairat hui thi

achanak a gai thi apne age

achanak bat ki jurat hui thi

khud apna sath bhi chubhne laga tha

ajab tanhai ki adat hui thi

mire andar bhanwar uthne lage the

samundar se bari wahshat hui thi

bahut sargoshiyan shishe se ki thin

kisi ki mujh se bhi ghibat hui thi