وہ زخم پھر سے ہرا ہے نشاں نہ تھا جس کا

وہ زخم پھر سے ہرا ہے نشاں نہ تھا جس کا

ہوئی ہے رات وہ بارش گماں نہ تھا جس کا

ہوائیں خود اسے ساحل پہ لا کے چھوڑ گئیں

وہ ایک ناؤ کوئی بادباں نہ تھا جس کا

کشید کرتا رہا ہجرتوں سے درد کی مے

کوئی تو تھا کہ کہیں ہم زباں نہ تھا جس کا

اسی کے دم سے تھی رونق تمام بستی میں

کہ خندہ لب تھا مگر غم عیاں نہ تھا جس کا

جلی تو یوں کہ ہوا راکھ انگ انگ مرا

عجیب آگ تھی کوئی دھواں نہ تھا جس کا

wo zakhm phir se hara hai nishan na tha jis ka

hui hai rat wo barish guman na tha jis ka

hawaen khud use sahil pe la ke chhor gain

wo ek nao koi badban na tha jis ka

kashid karta raha hijraton se dard ki mai

koi to tha ke kahin ham zaban na tha jis ka

usi ke dam se thi raunaq tamam basti mein

ke khanda lab tha magar gham ayan na tha jis ka

jali to yun ke hua rakh ang ang mira

ajib ag thi koi dhuan na tha jis ka