کسی کشش کے کسی سلسلے کا ہونا تھا

کسی کشش کے کسی سلسلے کا ہونا تھا

ہمیں بھی آخرش اک دائرے کا ہونا تھا

ابھی سے اچھا ہوا رات سو گئی ورنہ

کبھی تو ختم سفر رت جگے کا ہونا تھا

برہنہ تن بڑی گزری تھی زندگی اپنی

لباس ہم کو ہی اک دوسرے کا ہونا تھا

ہم اپنا دیدۂ بینا پہن کے نکلے تھے

سڑک کے بیچ کسی حادثے کا ہونا تھا

ہمارے پاؤں سے لپٹی ہوئی قیامت تھی

قدم قدم پہ کسی زلزلے کا ہونا تھا

ہم اپنے سامنے ہر لمحہ مرتے رہتے تھے

ہمارے دل میں کسی مقبرے کا ہونا تھا

تمام رات بلاتا رہا ہے اک تارہ

افق کے پار کسی معجزے کا ہونا تھا

کسی کے سامنے اٹھی نظر تو بہہ نکلا

ہماری آنکھ میں کیا آبلے کا ہونا تھا

حصار شہر سے باہر نکل ہی آئے ہیں

کبھی ہمیں بھی کسی راستے کا ہونا تھا

kisi kashish ke kisi silsile ka hona tha

hamen bhi akhirash ik daire ka hona tha

abhi se achchha hua rat so gai warna

kabhi to khatm-e-safar rut jage ka hona tha

barahna tan bari guzri thi zindagi apni

libas ham ko hi ik dusre ka hona tha

ham apna dida-e-bina pahan ke nikle the

sarak ke bich kisi hadse ka hona tha

hamare paon se lipti hui qayamat thi

qadam qadam pe kisi zalzale ka hona tha

ham apne samne har lamha marte rahte the

hamare dil mein kisi maqbare ka hona tha

tamam rat bulata raha hai ik tara

ufuq ke par kisi mojize ka hona tha

kisi ke samne uthi nazar to bah nikla

hamari ankh mein kya able ka hona tha

hisar-e-shahr se bahar nikal hi ae hain

kabhi hamen bhi kisi raste ka hona tha