عمر گزری کہ تجھے ہم نے بھلا رکھا ہے

عمر گزری کہ تجھے ہم نے بھلا رکھا ہے

اپنے ہر جاننے والے کو بتا رکھا ہے

نہ سہی وصل کوئی جسم تو ہو پہلو میں

مجھ کو تنہائی نے دیوانہ بنا رکھا ہے

ہیں نشہ کے سبھی سامان مرے کمرے میں

اور ایک طاق پہ زاہد کا خدا رکھا ہے

کل ملا کر کوئی چوبیس ہیں غم الفت کے

ان میں اک غم ہے جسے سب سے جدا رکھا ہے

جس کی لو دیکھ کے بھٹکے ہوئے آ جاتے تھے

کچھ دنوں سے وہ دیا ہم نے بجھا رکھا ہے

زندگی کا مری ہر باب عیاں دنیا پر

میں نے اس طرح ہر اک عیب چھپا رکھا ہے

umr guzri ke tujhe ham ne bhula rakha hai

apne har janne wale ko bata rakha hai

na sahi wasl koi jism to ho pahlu mein

mujh ko tanhai ne diwana bana rakha hai

hain nasha ke sabhi saman mire kamre mein

aur ek taq pe zahid ka khuda rakha hai

kal mila kar koi chaubis hain gham ulfat ke

un mein ik gham hai jise sab se juda rakha hai

jis ki lau dekh ke bhatke hue a jate the

kuchh dinon se wo diya ham ne bujha rakha hai

zindagi ka miri har bab ayan duniya par

main ne is tarah har ik aib chhupa rakha hai