اب کہاں وہ وقت کے بے لوث یاری چاہیئے

اب کہاں وہ وقت کے بے لوث یاری چاہیئے

عمر کے اس دور میں اب ذمہ داری چاہیئے

وصل‌ و فرقت کے طلسمی دائروں سے ٹوٹ کر

اب رفاقت میں ہمیں کچھ پائیداری چاہیئے

یوں نہیں کے صبر کی تلقین کر کے چل دئے

چارہ گر ہیں تو مسلسل غم گساری چاہیئے

کس قدر ہیں لوگ میرے حال پر ماتم کناں

شکل پر اپنی بھی کچھ تو سوگواری چاہیئے

ہم سفر چننا بھی ہے اک کاروبار زندگی

سو ہمیں عاشق نہیں اک کاروباری چاہیئے

ab kahan wo waqt ke be los yari chahiye

umr ke is daur mein ab zimma dari chahiye

wasl-o-furqat ke tilismi dairon se tut kar

ab rifaqat mein hamen kuchh paidari chahiye

yun nahin ke sabr ki talqin kar ke chal diye

chara gar hain to musalsal gham gusari chahiye

kis qadar hain log mere hal par matam kunan

shakl par apni bhi kuchh to sogwari chahiye

ham safar chunna bhi hai ik karobar-e-zindagi

so hamen ashiq nahin ik karobari chahiye