ہوا ہے نہ ہوگا زمانہ کسی کا

ہوا ہے نہ ہوگا زمانہ کسی کا

اٹھانا کسی کو گرانا کسی کا

کئی رہ نما تھے علاوہ بھی دل کے

مگر ہم نے کہنا نہ مانا کسی کا

تعلق کہاں زندگی سے ہمارا

تعارف ہے بس غائبانہ کسی کا

مقدر ہی اول مقدر ہی آخر

نہ پانی کسی کا نہ دانہ کسی کا

جو باقی بچیں گے وہ کیسے جئیں گے

اگر ہو ہی جائے زمانہ کسی کا

بنا وجہ عظمت نظر میں سبھی کی

جو کردار تھا مجرمانہ کسی کا

زمانے کو برداشت ہوتا نہیں ہے

نیا کوئی پودا لگانا کسی کا

بہت درد دیتا ہے پرویزؔ اخترؔ

مسلسل ہمیں آزمانا کسی کا

وہاں پر ہیں پرویزؔ اب ہم جہاں پر

نہ آنا کسی کا نہ جانا کسی کا

hua hai na hoga zamana kisi ka

uthana kisi ko girana kisi ka

kai rah numa the alawa bhi dil ke

magar ham ne kahna na mana kisi ka

taalluq kahan zindagi se hamara

taaruf hai bas ghaibana kisi ka

muqaddar hi awwal muqaddar hi akhir

na pani kisi ka na dana kisi ka

jo baqi bachenge wo kaise jiyen ge

agar ho hi jae zamana kisi ka

bana wajh-e-azmat nazar mein sabhi ki

jo kirdar tha mujrimana kisi ka

zamane ko bardasht hota nahin hai

naya koi pauda lagana kisi ka

bahut dard deta hai parwez akhtar

musalsal hamen azmana kisi ka

wahan par hain parwez ab ham jahan par

na ana kisi ka na jana kisi ka