دیکھو تو سہی زیست کے امکان بھی ہوں گے

دیکھو تو سہی زیست کے امکان بھی ہوں گے

شاید کہ اسی بھیڑ میں انسان بھی ہوں گے

گردن پہ لگے زخم کی سوزش سے کھلی آنکھ

ہم سوچتے تھے جنگ کے اعلان بھی ہوں گے

اللہ کسی کو کبھی بھوکا نہیں رکھتا

دل اس نے دیا ہے تو کچھ ارمان بھی ہوں گے

دنیا میں کوئی چیز بھی بے وجہ نہیں ہے

میں ہوں تو مرے واسطے میدان بھی ہوں گے

دیکھو کبھی دنیا تو پریشان نہ ہونا

اب خیر سے دیدے ہیں تو حیران بھی ہوں گے

نیکی کا بدی سے ہے بہت پاس کا رشتہ

انعام کے نزدیک ہی بہتان بھی ہوں گے

لازم ہے تو ملزوم بھی ہوگا یہیں پرویزؔ

جب زخم ملے ہیں تو نمکدان بھی ہوں گے

dekho to sahi zist ke imkan bhi honge

shayad ke isi bhir mein insan bhi honge

gardan pe lage zakhm ki sozish se khuli ankh

ham sochte the jang ke elan bhi honge

allah kisi ko kabhi bhuka nahin rakhta

dil us ne diya hai to kuchh arman bhi honge

duniya mein koi chiz bhi be wajh nahin hai

main hun to mire waste maidan bhi honge

dekho kabhi duniya to pareshan na hona

ab khair se dide hain to hairan bhi honge

neki ka badi se hai bahut pas ka rishta

inam ke nazdik hi bohtan bhi honge

lazim hai to malzum bhi hoga yahin parwez

jab zakhm mile hain to namakdan bhi honge