سب کی آنکھوں میں رہا کرتے تھے

سب کی آنکھوں میں رہا کرتے تھے

فرد ہیں قوم ہوا کرتے تھے

اب تعلق میں غرض ہے شامل

دوست بچپن میں ہوا کرتے تھے

راستے تال تلیا، ٹیلے

کتنے رومان ہوا کرتے تھے

اس کا خوش ہونا بہت بھاتا تھا

ہم نشانے کو خطا کرتے تھے

عشق پروان وہاں چڑھتا تھا

جہاں آسیب رہا کرتے تھے

ہاتھ تو اب بھی ملاتے ہیں لوگ

دل مگر پہلے ملا کرتے تھے

دست برداری ہمیں آتی تھی

ہم کہا مان لیا کرتے تھے

کر لیا خود کو ہی برباد آخر

وقت برباد کیا کرتے تھے

پہلے آنکھوں کو میسر تھے آپ

پہلے ہم شعر کہا کرتے تھے

sab ki ankhon mein raha karte the

fard hain qaum hua karte the

ab taalluq mein gharaz hai shamil

dost bachpan mein hua karte the

raste tal talayya, tele

kitne ruman hua karte the

us ka khush hona bahut bhata tha

ham nishane ko khata karte the

ishq parwan wahan charhta tha

jahan aseb raha karte the

hath to ab bhi milate hain log

dil magar pahle mila karte the

dast bardari hamen ati thi

ham kaha man liya karte the

kar liya khud ko hi barbad akhir

waqt barbad kiya karte the

pahle ankhon ko muyassar the ap

pahle ham sher kaha karte the