اگر سفر میں مرے ساتھ میرا یار چلے

اگر سفر میں مرے ساتھ میرا یار چلے

طواف کرتا ہوا موسم بہار چلے

لگا کے وقت کو ٹھوکر جو خاکسار چلے

یقیں کے قافلے ہم راہ بے شمار چلے

نوازنا ہے تو پھر اس طرح نواز مجھے

کہ میرے بعد مرا ذکر بار بار چلے

یہ جسم کیا ہے کوئی پیرہن ادھار کا ہے

یہیں سنبھال کے پہنا یہیں اتار چلے

یہ جگنوؤں سے بھرا آسماں جہاں تک ہے

وہاں تلک تری نظروں کا اقتدار چلے

یہی تو ایک تمنا ہے اس مسافر کی

جو تم نہیں تو سفر میں تمہارا پیار چلے

agar safar mein mire sath mera yar chale

tawaf karta hua mausam-e-bahar chale

laga ke waqt ko thokar jo khaksar chale

yaqin ke qafile ham rah be shumar chale

nawazna hai to phir is tarah nawaz mujhe

ke mere baad mira zikr bar bar chale

ye jism kya hai koi pairahan udhar ka hai

yahin sambhal ke pahna yahin utar chale

ye jugnuon se bhara asman jahan tak hai

wahan talak tiri nazron ka iqtidar chale

yahi to ek tamanna hai is musafir ki

jo tum nahin to safar mein tumhara pyar chale