یہ اور بات دور رہے منزلوں سے ہم

یہ اور بات دور رہے منزلوں سے ہم

بچ کر چلے ہمیشہ مگر قافلوں سے ہم

ہونے کو پھر شکار نئی الجھنوں سے ہم

ملتے ہیں روز اپنے کئی دوستوں سے ہم

برسوں فریب کھاتے رہے دوسروں سے ہم

اپنی سمجھ میں آئے بڑی مشکلوں سے ہم

منزل کی ہے طلب تو ہمیں ساتھ لے چلو

واقف ہیں خوب راہ کی باریکیوں سے ہم

جن کے پروں پے صبح کی خوشبو کے رنگ ہیں

بچپن ادھار لائے ہیں ان تتلیوں سے ہم

کچھ تو ہمارے بیچ کبھی دوریاں بھی ہوں

تنگ آ گئے ہیں روز کی نزدیکیوں سے ہم

گزریں ہمارے گھر کی کسی رہ گزر سے وہ

پردہ ہٹائیں دیکھیں انہیں کھڑکیوں سے ہم

جب بھی کہا کہ یاد ہماری کہاں انہیں

پکڑے گئے ہیں ٹھیک تبھی ہچکیوں سے ہم

ye aur bat dur rahe manzilon se ham

bach kar chale hamesha magar qafilon se ham

hone ko phir shikar nai uljhanon se ham

milte hain roz apne kai doston se ham

barson fareb khate rahe dusron se ham

apni samajh mein ae bari mushkilon se ham

manzil ki hai talab to hamen sath le chalo

waqif hain khub rah ki barikiyon se ham

jin ke parun pe subh ki khushbu ke rang hain

bachpan udhar lae hain in titliyon se ham

kuchh to hamare bich kabhi duriyan bhi hun

tang a gae hain roz ki nazdikiyon se ham

guzren hamare ghar ki kisi rah guzar se wo

parda hataen dekhen unhen khirkiyon se ham

jab bhi kaha ke yad hamari kahan unhen

pakre gae hain thik tabhi hichkiyon se ham