اس پہ دھبہ نہ لگا نام کو رسوائی کا

اس پہ دھبہ نہ لگا نام کو رسوائی کا

آج تک پاک ہے دامن مری بینائی کا

یاد ہے کس کو سبب اس کی شناسائی کا

وہ بھی اک ہوگا کرشمہ اسی بینائی کا

گرمیٔ ذوق نظارہ سے نہیں اشک رواں

اصل میں ہے یہ پسینہ مری بینائی کا

ٹھوکروں سے مری نظروں کو الٰہی تو بچا

اب قدم بڑھنے لگا ہے مری بینائی کا

ہوں گے طے بعد تقرب کے مراحل سارے

دیکھ لینا ہی بڑا کام ہے بینائی کا

اس میں ہر وقت بھری رہتی ہے نظروں کی شراب

آنکھ پیمانہ ہے مے خانۂ بینائی کا

آ گئی چشم کرم حضرت زیرک کی جو یاد

قدرؔ نے قید کیا قافیہ بینائی کا

us pe dhabba na laga nam ko ruswai ka

aj tak pak hai daman miri binai ka

yad hai kis ko sabab us ki shanasai ka

wo bhi ik hoga karishma isi binai ka

garmi-e-zauq-e-nazara se nahin ashk-e-rawan

asl mein hai ye pasina miri binai ka

thokaron se miri nazron ko ilahi to bacha

ab qadam barhne laga hai miri binai ka

honge tai baad taqarrub ke marahil sare

dekh lena hi bara kam hai binai ka

is mein har waqt bhari rahti hai nazron ki sharab

ankh paimana hai mai khana-e-binai ka

a gai chashm-e-karam hazrat-e-zirak ki jo yad

qadr ne qaid kiya qafiya binai ka